Helium Vola - Do Tagte Ez

Owe -
Sol aber mir iemer me
Geliuhten dur die naht
Noch wizer danne ein sne
Ir lip vil wol geslaht?
Der trouc diu ougen min
Ich wande, ez solde sin
Des liehten manen schin
Do tagte ez

"Owe -
Sol aber er iemer me
Den morgen hie betagen?
Als uns diu naht enge
Daz wir niht durfen klagen:
'Owe, nu ist ez tac'
Als er mir klage pflac
do er jungest bi mir lac
Do tagte ez."

Owe -
Si kuste ane zal
In dem slafe mich
Do vielen hin ze tal
Ir trehene nider sich
Jedoch getrostet ich sie
Daz si ir weinen lie
Und mich al umbevie
Do tagte ez

"Owe -
Daz er so dicke sich
Bi mir ersehen hat!
Als er endahte mich
So wolt er sunder wat
Min arme schouwen bloz
Ez was ein wunder groz
Daz in des nie vergoz
Do tagte ez."